March 28, 2012

حوار مع إسماعيل أبو حاتم


فيما يلي لقاء مع مرشح للرئاسة وهمى ليس له وجود. أى تشابه بين الشخص فى هذا اللقاء وأشخاص معروفين هو صدفة بحتة.. وما تحاولش تعمل حدق وتقوللى أنا عارف إنت بتتكلم على مين لإن بجد.. بجد.. بجد.. I swear ..الشخصية دى خيالية تماماً ولا تمت للواقع بصلة.. إعتبرها شخصية من الفضاء الخارجى أو من عالم تانى ليس له وجود.. أو حتى إفتكاسة من كاتب المقال.


صباح الخير يا أستاذ أبو حاتم
السلام عليكم ورحمة الله وبركاته

عايزين نتكلم عن برنامجك الإنتخابى..
(مقاطعاً) طبعاً.. ده شئ يسعدنى.. بس قبل ما نخش فى التفاصيل أحب أقول إن الحمد لله ربنا كرمنى بخبرة واسعة فى مجالات عديدة ومتنوعة ومع ذلك أنا أحب إنى أدى العيش لخبازه.. وعشان كده أنا عندى أربعة مليون مستشار فى جميع المجالات ومن جميع طوائف الشعب.. عندى رجالة وستات.. مسلمين ومسيحيين.. أطفال وشيوخ.. عندى أنواع من الحيوانات.. يعنى مثلاً الكلاب البلدى منتشرة جداً فى مصر وليس لها تمثيل فى البرلمان.. عندى قطة وعصفور كنارى.. وبرضه جايب أنواع من النباتات مستشارين فى الزراعة.. وجايب ناس حجمهم صغير من الصين.. لأنى أحب إن كل الناس تبدى رأيها وتساهم بخبراتها فى كتابة البرنامج بتاعى.

بالنسبة للصناعة.. إيه تفاصيل البرنامج؟
أهم صناعة عندى هى صناعة الملابس.. طبقاً لدراسة عندى من طب أسيوط والجامعة الملكية البريطانية، الإنسان عنده 3 رجلين.. ومع ذلك لما تنزلى محلات وسط البلد أو مدينة نصر تلاقى إن كل البنطلونات معمولة برجلتين فقط.. ودى بتمثل فرصة ذهبية إن إحنا بنبى مصانع كتير جداً لصناعة البنطلون أبو 3 رجلين.. الصناعة دى لوحدها ممكن تستوعب أكتر من مليار عامل مصرى وتصدر منتجاتها إلى كل دول العالم.. ولكى أن تتخيلى - سيدتى الفاضلة - حجم صناعة الشرابات والجزم إللى ممكن تقوم مع صناعة البنطلون.. بالإضافة إلى صناعة الأحزمة والمصنوعات الجلدية.

 الصناعة التانية هى صناعة الساعات.. أنا بقالى أكتر من 15 سنة متابع ساعة بيج بن فى لندن وعندى تقرير من البى بى سى إن اليوم 30 ساعة.. مع ذلك تلاقى كل الساعات 24 ساعة بس.. ناس كتيرة مخدوعة فى موضوع إن اليوم 24 ساعة لإن دى مؤامرة من سويسرا لإحتكار صناعة الساعات. إحنا حا نصنع الساعات فى مصر ونضرب الصناعة دى فى سويسرا فى مقتل.

بس حضرتك العالم كله ماشى بساعات 24 ساعة حا نغير العالم كله إزاى؟
لو معرفناش نغير العالم كله.. حا نعمل الساعة 50 دقيقة وكده نوفر 10 دقايق فى كل ساعة يعملوا 240 دقيقة فى اليوم إللى يغطوا الـ 6 ساعات الإضافية ويفيضوا كمان.

طيب بالنسبة للزراعة؟
معروف إن هناك مساحات شاسعة من الصحراء فى مصر غير مستغلة.. ولما كنت فى السودان سنة 1934 لاقيت أراضى زراعية كتير جداً غير مستغلة.. ملايين الأفدنة.. فلاقيت إن أحسن حل هو إن إحنا نستورد 6 مليون فدان من السودان ونفردهم فى الصحراء الغربية عندنا وبكده نبقى ضاعفنا الرقعة الزراعية عندنا 8000 ضعف.. وده يكون كافى إن إحنا نصدر خضروات للعالم كله لمدة الأربع تلاف سنة القادمين.

طيب وحا ننقل الأفدنة دى إزاى؟ هل حا نبنى سكة حديد؟
أنا سألت نفسى السؤال ده برضه.. والحقيقة أنا كنت شفت فكرة فى ماليزيا سنة 1820 لما كنت بأزورها لدراسة الميكانيكا.. لما كانوا بيقطفوا نبات الأسبارجوس كانوا بيعملوا سلسلة من البشر كل واحد يناول إللى بعده لغاية ما يوصلوها للسلة إللى بيجمعوا فيها المحصول.. لما حضرتك تفكرى كده، تلاقى إن إحنا حوالى 4 مليار مصرى، لو عملنا سلسلة بشرية تبدأ من الوادى الجديد لغاية الخرطوم نقدر ننقل كل الطمي بتاع السودان فى حوالى 11 يوم.. أنا حسبتها بالورقة والقلم..

بالنسبة للسياحة إيه خطتكم؟
أنا سعيد إن حضرتك فتحتى الموضوع ده.. لأن فى ناس كتير بتتهمنى إنى متشدد مع إنى ليبرالى جداً وعشت أكتر من 200 سنة فى الخارج وعامل 2 دكتوراة فى التفتح.. الحقيقة إن السياحة من أهم مصادر الرزق فى مصر.. وللأسف الناس فاهماها غلط خالص ومش قادرة تستوعب العقلية الأوروبية إللى أنا متربى معاها وفاهمها كويس جداً.. بيقولك السايح فى مصر عايز يلبس مايوه عشان ينزل البحر.. طبعاً الحاجات دى مخالفة للشرع بس فى نفس الوقت إحنا مش عايزين نقفل السياحة.. فأنا فكرت إن إحنا حا نركب كاميرات على كل الشواطئ بتنقل صورة حية للبحر.. وحا نركب شاشات عملاقة فى كل غرفة فى الفنادق وحا نحط رملة على الأرض ونوصل حنفية مياه مالحة جوه الغرفة.. وكده يبقى السايح يقدر يستمتع بالبحر من غير ما يلبس مايوه قدام الناس.. وإن شالله يقعد بلبوص فى الغرفة طالما بيعمل كده فى خصوصيته.. وطبعاً الشاشات دى ممكن تستعمل تلفزيون وبكده نوفر على صاحب الفندق تكلفة إنه يشترى تليفزيون إضافى وبالتالي يقدر ينزل أسعاره ونضرب أسبانيا فى السياحة بسهولة جداً..وغير كده ممكن نتوسع فى سياحة جديدة من إبتكاري إسمها سياحة الإنترنت وممكن السايح يقعد فى بلده ويتفرج على البحر على الكومبيوتر ويوفر تكاليف السفر.. ودى ممكن تعمل حوالى 200 تريليون دولار عائد سنوي للبلد..

وبرضه عشان حضرتك تبقى شايفة حجم الترابط فى البرنامج بتاعي.. الرملة إللى حا نحطها فى الغرفة دى حا تيجي منين؟ حا ننقلها من الصحراء الغربية لإنى زى ما قلت لحضرتك حا نزرع الصحراء وبالتالي مش حا نحتاج الرملة فى حاجة.. وده طبعاً حا ينعش مهنة النقل وإللى عايش عليها أكتر من 230 مليون مصري..

وبالنسبة للإقتصاد؟ إيه توجهاتك؟
جيتى بقى فى تخصصي.. الإقتصاد طبعاً أهم حاجة وأكبر تحدي قدامنا فى الفترة القادمة.. عندنا حوالى 140% من الشعب المصري تحت خط الفقر أو جنبه على طول.. وأنا البرنامج بتاعي قائم على إن لازم نوفر الكرامة لكل المصريين.. كل الناس فاهمة إن أنا بأطالب بأليآت السوق الحرة وبالتالى أنا رأصمالي.. ولكن ده طبعاً مخالف للشرع: أولاً لإن السوق الحرة بيتباع فيها خمرة ودى حرام.. وثانياً: لإن الرأص حرام وبالتالى الرأصمالية حرام.. أنا مارست الشيوعية لمدة 20 سنة لما كنت فى روسيا أيام الثورة البلشفية ومارست الإشتراكية فى السويد فى بدايات القرن الثامن.. ولكن أحسن نظام هو نظام المقايضة وبالإنجليزي إسمها Bartender Econoomy .. مشهورة جداً حضرتك بصي عليها على الإنترنت.. حا نعمل رحلتين فى السنة: واحدة فى الصيف وواحدة فى الشتا يروح فيها كل المصريين كأسرة واحدة متماسكة ومترابطة.. ناخد إنتاجنا من الساعات ومن البنطلونات ومن نبات الأسباراجوس ونطلع بيها على الشام.. هناك عندهم سوق كبير جداً فى إسطنبول بيبيع كل المنتجات.. عامل زى سوق الحرامية عندنا.. نبدل المنتجات بتاعتنا بإحتياجاتنا من التلاجات وفلاتر زيت العربية ومغارف الشوربة (ودى بتستخدم فى الملوخية كمان فنوفر فى المصاريف) ونرجع تاني.. وطبعاً حا نبنى كوبرى ما بيننا وبين إسطنبول عشان الناس تروح وتيجي من عليه وده حا يشجع صناعة السيارات ويشغل المقاولين.. إلخ..

بالنسبة لتطبيق الشريعة؟ إيه وجهة نظر حضرتك؟
الناس كلها خايفة من الموضوع ده بس أنا عايز أطمن الناس.. أنا ربنا كرمنى وكنت موجود فى الأيام الأولى لنزول الإسلام وحضرت تطبيق الشريعة فى أولها ودرست شريعة فى الدولة العباسية ورحت الأندلس وفاهم الموضوع ده كويس.. الشريعة ما ينفعش تتطبق فى يوم وليلة.. لازم الناس تستوعبها وتحبها وتطلبها بنفسها.. وعشان كده عندى برنامج لتطبيقها بالتدريج على مدار أربعة أيام إبتداءً من يوم الإتنين - إللى بعد ما أمسك البلد - لحد يوم الخميس.. كل يوم نطبق حتة صغيرة منها عشان الناس تتعود..وكده نلحق نصلي الجمعة كلنا مع بعض..

فى النهاية تحب تضيف حاجة؟
الحقيقة إن الرنامج بتاعي – زى ما حضرتك شفتى – مترابط ببعضه وكله بيخدم بعضه عشان البلد تنتعش.. لكن البرنامج ده مش أهم ما أقدمه للمواطن وأساساً أنا مش ناوي أنفذه بس حبيت أوريكو إمكانياتي وإنى أعرف أعمل برنامج ما يخرش الميه.. أهم حاجة إننا "سنحيا كراماً"

19 comments:

  1. mas5arrraaaa.....well done : )))))
    hope all people can see like you

    ReplyDelete
  2. المخيف ان الكلام ده مش مختلف كتير عن الكلام اللى البيه بيقوله فعلا

    ReplyDelete
    Replies
    1. على فكرة الشخصية إللى أنا بأتكلم عليها دى مش موجودة فى الحقيقة.. دى شخصية خيالية.. ما تعملش حدق وتقول إنك عارف هو مين :P

      Delete
  3. 7elw 2awi ya Karim, keep the good work :)))))))

    ReplyDelete
  4. مش عارفة اعبر - كم العبقرية الفي التدوينة دي تكسب نظرية اينشتاين للنسبية و اكتشاف توماس ايديسون للمبة مع بعض
    If only 1 out of 10 people are equally humorous and witty and smart, the world would have been a better place.

    ReplyDelete
  5. enta to2sod el barad3y balash ta7weer

    ReplyDelete
  6. سنحيا خارقوووووون :D :D

    ReplyDelete
  7. هههه جميل جدا جدا استمعت فعلا بكلام حضرتك و سنعيش فينو :)

    ReplyDelete
  8. انا عارف انت بتتكلم عن مين يا كريم، علي فكرة كلامك مفضوح قوي واي طفل عارف انت بتتكلم عن مين--))

    ReplyDelete
  9. khale balak ya negm you'll be "etkhazwa2" isa :D

    ReplyDelete
  10. hahaha ... Nice one.. el fahlawa el la neha2ya wel wosolya lel manseb w khalas .. under any circumstances .. good blog ;)

    ReplyDelete