March 12, 2012

ياللا ننتخب رئيس

الدليل الكامل لمرشحين الرئاسة.. 

هذه هى الحلقة الأولى فى سلسلة حلقات لتساعدك على إختيار مرشح الرئاسة الأنسب لذوقك وتوقعاتك..


عبد المنعم أبو الفتوح
____________________________________
40 سنة فى الإخوان وإضطر يسيبها بعد ما فشل فى إصلاحها بسبب التيارات المحافظة الداخلية (إللى هو خيرت الشاطر من الآخر).. وطبعاً بعد ما فشل مع خيرت الشاطر حا يقطع طنطاوى وعمر سليمان والداخلية وكده.. ما عندوش إنجازات غير فى نقابة الأطباء وطبعاً إحنا لامسين التقدم العنيف إللى حصل للطب والأطباء.. هو راجل محترم بدون أى شك (على الأقل لغاية ما الإعلام يطرشئوا) وعنده رؤية وهو فعلاً حاول يعمل إصلاح فى الإخوان..

غير كده.. أبو الفتوح يتمتع بأزمة هوية عنيفة (أو يمكن هى تربية الإخوان إللى يقولوا الشئ وضده فى نفس الجملة).. شوية يقول إسلامية وشوية يقول تركيا.. شوية ينفخ فى السياحة وشوية يفشخها.. ولكن برضه مديرة حملته يسارية متبرجة (يعنى مش لابسة حجاب وشعرها كيرلى كمان)..

إذا كنت تبحث عن رئيس محترم وإبن ناس وكيوت ومايضايقش حد وعنده صبغة إسلامية تريح ضميرك.. إنتخب أبو الفتوح

حازم أبو إسماعيل
___________________________________
من السياسيين القلائل إللى كانوا متواجدين فى الميدان وعنده حس ثورى.. أغلب معلوماته خارج الدين من قعدات دردشة وتعليقات الجهابذة إللى متابعين حلقاته على خدمة الإس إم إس إللى بتدفع فيها تلاتة جنيه دى.. معرفته بأى حاجة خارج جمهورية مصر العربية زى معرفة حضرتك باللغة البلغارية.. يمكن إنت وضعك أحسن شوية.. عنده شغف بالأرقام ويحب يرمى عشرة إتناشر صفر زيادة على أى رقم عشان بيبقى شكل الرقم أظرف بكتير.. تصريحاته كلها ثورية وعنترية ويموت فى التهديد..صاحب المقولة الشهيرة إن بيبسى يعنى إنك بتساند إسرائيل..

فكرته عن المشروع الإسلامى هى السعودية من غير البترول وطبعاً من غير الحريات الواسعة الموجودة فى السعودية.. عايز مشكوراً يحجب الستات وهيئة الأمر بالمعروف وإلى آخره من الأفكار التقدمية إللى من النوع ده.. المشكلة إنه الوحيد إللى غالباً راديكالى بالدرجة الكافية إنه يشيل العسكر..

إذا كنت تبحث عن رئيس قوى قادر على إزاحة العسكر وغالباً إزاحتك إنت والمدام والأولاد كمان بالمرة.. إنتخب أبو إسماعيل

عمرو موسى
 ____________________________________
سياسى محنك وقديم (قديم زى الجبنة الروكفوركده).. دبلوماسى.. يعنى حا يسرقك وإنت مبسوط وبتصقف كمان.. ما عندوش أى أيديولوجية واضحة.. يعنى لا تعرف هو رأسمالى ولا يسارى ولا إسلامى.. إنجازاته صفر.. كان ممكن يكون المرشح التوافقى بس ما حدش لغاية دلوقتى عارف ياخد منه حق ولا باطل.. حتى المجلس العسكرى شكله رمى طوبته من كتر ما بيلاوعهم فى الكلام.. لو واقف تحت البيت عندك وسئلته سؤال ممكن يتوهك لدرجة إنك ما تعرفش تروح..

من بقايا نظام مبارك.. لم يتهم بالفساد المالى بأى شكل.. نزل الميدان أيام التحرير عشان يتصور مع الدبابة مش أكتر.. أبعد ما يكون عن الثورية.. إبتدى الحملة بتاعته يوم 11 فبراير 2011 الساعة سابعة بليل ومن ساعتها ما بيهمدش.. أكتر مرشح لف فى البلد..

إذا كنت تبحث عن رئيس ما تعرفش عنه حاجة بس بيتكلم كتير.. إنتخب عمرو موسى

محمد سليم العوا
 ____________________________________
مفكر إسلامي.. يعنى بيقعد على كرسى ويفكر، بس بيفكر بما لا يخالف شرع الله.. يقال إنه كان أمن دولة بس غالباً هو أمن وطنى.. إشترك فى جميع اللجان الممكنة والمجالس الإستشارية والغير إستشارية إللى وقعت تحت إيده.. مفكر بقى.. ممكن تشبهه بالماء: لا لون ولا طعم ولا ريحة.. يتميز بحواجبه التى تعتبر منفصلة تماماً عن بقية وجهه.. عنده مشروع إسلامى بس مش راضى يقولنا عليه..

إذا كنت تبحث عن رئيس إسلامى وفى نفس الوقت بتخاف على مشاعر الجيش قوى.. إنتخب محمد سليم العوا

خالد على
____________________________________
محامى حقوقى يساري.. بس أقصى اليسار، يعنى لابس فى الرصيف.. الشاب الوحيد فى المرشحين المحتملين والوحيد إللى إشترك فى الثورة من أول يوم إشتراك كامل وحتى يومنا هذا.. من الشخصيات العامة فى تويتر يعنى فى تقريباً ألفين شخص يعرفوه (بالضبط هما ألفين وتسعة نفر عشان الدقة).. إتجاهاته إشتراكية / شيوعية يعنى قطاع عام وعمال وفلاحين وبس.. وإحتمال الشركة إللى إنت بتشتغل فيها تأمم وتتوزع على عمال نسيج كفر الدوار.. الوحيد إللى عنده مشروعات ثورية حقيقية بس من بتاعت عبالناصر للى بيحبوا الحاجات دى.. فما تستغربش لو لقيت نفسك كمان سنة لابس بدلة سفارى كاكى فى الصيف وزيها كم طويل بس بنى غامق فى الشتا.. ده مش عيب فى الإشتراكية بس أحب أوضح.. أغلب إنجازاته كانت فى إسترداد الشركات التى تم تخصيصها للحكومة..

بغض النظر عن موضوع أقصى اليسار.. هو أكتر مرشح يمثل الشباب والثورة..

إذا كنت تبحث عن رئيس جمهورية إشتراكى وشاب ومش فارق معاك إنك حا تكون واحد من ألفين واحد ينتخبوه.. إنتخب خالد على


منصورحسن
____________________________________
لما كان مرشح إنه يكون نائب رئيس الجمهورية كان أنا عندى 4 سنين.. من أيام ما كان مرشح نائب رئيس لغاية دلوقتى إخترعوا الفيديو والسى دى والدى فى دى والموبايل وإخترعوا الأتارى والجيم بوى والإكس بوكس.. وأخيراً الإنترنت.. وهو مازال مصمم إن التلكس أكتر طريقة مضمونة للتواصل.. الوحيد من المرشحين إللى إختار نائب رئيس وبعدين شيعه تانى يوم.. ووقع إختياره على اللواء / سامح سيف اليزل إللى هو محلل إستراتيجى وخبير أمنى وبيصلح تلاجات ويضبطلك الدش..

يقال إنه إستقال من الوزارة أيام السادات لأنه ما كانش مبسوط من الإعتقالات.. يعنى من حوالى خمسة وتلاتين سنة كان رجل ثورى..

إذا كنت تبحث عن رئيس جمهورية من باب الصدقة والإحسان.. إنتخب منصور حسن

أحمد شفيق
 ____________________________________
إذا كنت تفتقد مبارك الأب..مبارك الإنسان.. مبارك القائد.. مبارك الطيار.. فعليك وعلى شفيق.. لو بتتحسر على أيام ما قبل الثورة والإستقرار.. عليك وعلى شفيق.. لو وحشاك أيام ما كانوا الوحشين بيضربوا فى الإقسام والإخوان مستخبيين.. لازم نتنخبه.. هو رجل الكاريزما.. نفس الحضور إللى بتلاقيه من كومودينو (إتنين درج ودرفة).. نفس القدرة على التعبير بتاعت كوريك العربية.. إمكانيته فى المخاطبة شبيهة بفصاحة السجادة إللى مكتوب عليها WELCOME وإنت داخل البيت (وعليها نفس بقعة الصلصة لما القطة قطعت كيس الزبالة).. من إنجازاته مطار القاهرة الجديد.. فاهم النظام القديم كويس وبالتالى مش لازم تقلق من التغيير مع شفيق..

إذا كنت تبحث عن رئيس جمهورية يضمنلك إن ما فيش حاجة حا تتغير.. إنتخب أحمد شفيق


كده فاضل حوالى إتنين مليون مرشح رئاسى تانين حا نغطيهم فى الحلقات القادمة..

15 comments:

  1. طبقا لما ذكرت هنا يا سيدي ، فليس هناك من يصلح لحكم مصر

    حملة عودة ال مبارك هتنجح

    ReplyDelete
    Replies
    1. الموجودين دلوقتى لن يستطيعوا أن يغيروا.شيئا.. الثورة مستمرة

      Delete
  2. Mind-blowing really. Sarcasm is our only way out. I was suggesting we can make a comedy show hosting the rest - 2 million - candidates. Think about asking each one of them why they think they are fit for presidency? A blast.

    ReplyDelete
  3. انا كنت بفكر اكتب حاجة شبه كده بس الحمد لله مكتبتش عشان منظري كان هيكون وحش. انا اكتشوالي لول.د و انا قاعد في البيت

    ReplyDelete
  4. ياريت كل مرشح للرئاسة عند تقديمه أوراق ترشحه، يقدم برنامجه الانتخابى حتى يثبت للناخبين جديته فى العمل من أجل حل كل المشاكل التى تعانى منها مصر والتى على أساس نجاحه فى عرض هذه المشكلات وكيفية حلولها..سيقرر الناخبين من هو المرشح المستحق لأصواتهم.. على أن يكون تقديم البرنامج الانتخابى للمرشح أهم شروط قبول ترشيحه..وفى مقدمتها ...والله ولى التوفيق

    ReplyDelete
  5. تصليح معلش عبدالمنعم أبوالفتوح ساب الإخوان لانه كان عايز يترشح للرياسة وهما ماكانوش موافقين بس كده

    ReplyDelete
  6. ساخرة للحد اللى زود الرؤية تلويش ..بس ما عرفناش رايك فى حمدين صباحى والبسطاويسى كمان

    ReplyDelete
  7. طيب ده كلام رائع بجد. ممكن زيادة حمدين صباحى عشان يبقى وافى شامل

    ReplyDelete
  8. اقل ما يقال عن كاتب هذا المقال ان لا يعرف شء عن اى شئ لو عاوز مرشح يكدب عليك ويكرهك فى عيشتك ومش شايف اى حاجه فى الدنيا غير اخطاء الناس ولو عملو حاجه كويسه عمرو ما هيقولك عليها انتخب كاتب هذا المقال

    ReplyDelete
    Replies
    1. كلام الراجل كلة صحيح ولا واحد من المرشحين عندة تاريخ او خبرة او مؤهلات او حتى اليات تنفيذ برنامجة السياسى الناس ممكن تنتخب ابو الفتوح او حازم اوغيرة بس علشان انة انسان كويس ومحترم وهذا لا يكفى ابدااااااااااااا

      Delete
  9. Hamdeen Sabahy please :)
    أنا بضحك بقالى نص ساعة

    ReplyDelete
  10. جميل قوى كلامك بصراحة واقعى جدا وجرئ ونوضوعى

    ReplyDelete
  11. اسلوبك جميل اوى ... عايزين وصف لمرتضى سيديهات والبساطويسى وحمدين صباحى وبثينة كامل

    ReplyDelete
  12. ابو الفتوح أفضلهم و يليه خالد علي

    ReplyDelete
  13. من أول من قال عن العسكر ذئاب وثعالب
    من قال يوم 11 فبراير ده انقلاب عسكري
    من أجبر طنطاوي يطلع ويعلن عن الرئاسة ف يونيو
    من يشعربه المواطن البسيط ويصدقه ويضع صورته
    يبدوأنك لا تعرفه وتسمع الفيديوهات التي يشوههه بها منافسوه

    ReplyDelete