يوم الحد والدنيا هادية

عباد العباد

إذا كنت مؤمن بأيديولوجية معينة أو بشخص معين وماتقدرش تقبل نقد له إعرف إنك عبد لبنى آدم.. فإذا كنت من أنصار الليبرالية ولا تعترف إن الليبراليين فشلوا تماماً فى الإنتخابات لأنهم ركزوا على تشويه الإسلاميين بدل النزول للشارع و لأنهم عملوا زى الأرنب والزحلفة وكانوا فاكرين إن إعلامهم وفلوسهم حا تخلص الموضوع ولأنهم فاهمين إنهم برمات ومش لازم يتعاونوا.. يبقى إنت عبد للقائمين على الليبرالية.. أما لو كنت إخوانجى ومش شايف إنهم سياسيين وبيلعبوها بقذارة السياسة المعتادة.. لو مش شايف إنهم قاموا على وثيقة السلمى عشان بتلتف على إرادة الشعب بس مستعدين يكتبوا الدستور قبل الرئيس ضاربين بعرض الحائط نفس هذه الإرادة فقط عشان يخدموا مصالحهم السياسية.. أو لو مش شايف إنهم نزلوا الميدان فى ذكرى الثورة يحتفلوا عشان كسبوا الإنتخابات وعشان يطفوا نار الثورة.. يبقى إنت عبد للإخوان.. لو معجب بالبرادعى ومش شايف إنه خيبان خيبة قوية وإنه بتاع نظريات وتويتات ولكن مالوش كلمة فى الشارع.. لو مش شايف إن البرادعى آخر إنجازاته كانت من 3 سنين وما عملش حاجة تانية من ساعتها.. إعلم إنك عبد للبرادعى.. وإن كنت شايف إن أبو إسماعيل رجل فاضل ومحترم بس مش قادر تشوف إنه مالوش فى ولا حاجة تانية ولا يفقه شئ فى الإقتصاد أو الزراعة أو حتى السياسة الصح.. لو مش قادر تشوف إنه بينادى بالإعتصام وبعدين ينزل يقعد تلت ساعة ويمشى كأنه روك ستار.. إسمحلى إنت عبد لأبو إسماعيل..

لو إنت أى واحد من دول.. إعلم إنك من جماعة آسفين يا ريس مع إختلاف الريس..

أعزائى الإخوان المسلمون

لم أنتخبكم ولا أتفق مع ما رأيت من سياستكم ولا مواقفكم قبل الثورة ولا بعدها.. ولكنكم وصلتم للبرلمان، وهذا أمر واقع.. وواجبى كمواطن مصرى أن أتعاون معكم لصالح هذه البلد وأحرص على إنه - بالرغم من إختلافى الجذرى مع سياستكم - أن يتم تنفيذ ما هو فى صالح مصر.. وواجبى أيضاً أن أراقبكم وأن أحاسبكم إن أخطئتم أو تهاونتم.. وربما أكون قد تعاطفت معكم حين قمعكم النظام السابق، ولكنكم اليوم تتصدرون النظام الجديد فلن يشفع لكم تاريخكم ولكن سوف يشفع لكم حاضركم وما تقدمونه لشعب مصر..

إقامة الشريعة وتطبيق الحدود

لا أفهم حجم العاصفة التى يقودها العديد من الإسلاميين المطالبين بتطبيق الشريعة.. بحثت ووجدت الآتى:

لا يوجد حد لمن لم يردد الشهادة

لا يوجد حد للإمتناع عن الصلاة

لا يوجد حد للإمتناع عن الزكاة

لا يوجد حد للإمتناع عن الصوم

لا يوجد حد للإمتناع عن الحج

وهذه هى الأركان الخمسة للإسلام

لا يوجد حد لعدم إرتداء زى شرعى (سواء كان الحجاب أو النقاب أو زى للرجال)

لا يوجد حد للنميمة أو الكذب

لا يوجد حد لعدم تطبيق الشريعة فى الميراث

لا يوجد حد للزاوج من كافرة

لا يوجد إقامة حدود على غير المسلمين

لا يوجد حد لأكل الخنزير والميتة وذو الظفر

لا يوجد حد للربا

لا يوجد حد لعدم كتابة العقود فى البيع والشراء

حدود بها خلاف

حد الزنا (ما بين الرجم والجلد)

حد شرب الخمر

حد الردة

تبقى الحدود الصريحة وهى مذكورة فى 10 أيآت من ما يزيد عن 6000 آية

حد السرقة

حد القتل

حد الزنا (المذكور صراحةً وهو الجلد)

حد القذف

حد الحرابة (قطع الطريق)

كل ما هو غير ذلك هو إجتهاد وبه خلاف.. والأصل فى ذلك هو ]لاَ إِكْرَاهَ فِي الدِّينِ قَد تَّبَيَّنَ الرُّشْدُ مِنَ الْغَيِّ فَمَنْ يَكْفُرْ بِالطَّاغُوتِ وَيُؤْمِن بِاللّهِ فَقَدِ اسْتَمْسَكَ بِالْعُرْوَةِ الْوُثْقَىَ لاَ انفِصَامَ لَهَا وَاللّهُ سَمِيعٌ عَلِيمٌ} [البقرة:256{ وقوله تعالى: ] فَمَنْ شَاءَ فَلْيُؤْمِنْ وَمَنْ شَاءَ فَلْيَكْفُرْ [وجاءت فى مواقع مختلفة..

وبمراجعة المنطق فإن الحدود لم تنزل إلا فيما يحمى الفرد من تعدى شخصاً آخر.. أما كل ما له علاقة بالإيمان والعقيدة والشعائر فقد ترك للفرد..

الثورة الحقيقية

الثورة الحقيقية - ولا مؤاخذة - من تحت لفوق مش العكس.. ما أسهل إن رئيس يمشى أو أن وزير يقال وما أصعب إن مهندس حي أو مسؤل مخزن أنابيب بوتجاز يتشال من مكانه أو يغير من سلوكه.. وما أسهل إن يجى وزير عايز يعمل إصلاح حقيقى ويقف قدامه موظفين الوزارة ومؤسسات فسادها ويفشل فى أى إصلاحات..