الإخوان ونظرية المؤامرة

الإخوان طول النهار والليل طالعين علينا بنظرية المؤامرة.. شوية بتكون الفلول.. وشوية جبهة الإنقاذ.. والتمويل جاي مرة من إيران ومرة من دول آخرى أجنبية تريد زعزعة الأمن فى مصر.. 

أنا ماعنديش شك إن فعلاً في ناس عايزة توقع مصر.. وناس عايزة توقع الإخوان.. وناس عايزة توقع مصر عشان الإخوان توقع.. وناس عايزة مكاسب سياسية.. وناس عايزة البلد تفضل غير مستقرة عشان دى فيها مصلحة لهم.. وفى ناس جوة الحكومة وجوة الداخلية عايزة البلد تفضل فوضى.. وممكن يكون فى ناس فى الجيش والمخابرات مش عايزة الإخوان تحكم.. وفى ناس عايزة مصلحة البلد وشايفة إن الإخوان بيحاولوا يسيطروا.. 

ولكن حقيقة الأمر هي إن الإخوان هما السبب فى كل اللخبطة إللى إحنا عايشين فيها دي.. حجم الإنقسام إللى خلقوه فى الشارع وفى الأجهزة الحكومية وفى القوى السياسية هما السبب إن مش ممكن نعرف مين بيتشغل ضد مين ولأي غرض.. هل ده غباء سياسي منهم؟ وللا دي طريقة بيستخدموها عشان يبرروا فشلهم فى حل مشاكل البلد وقيادتهم الركيكة للمرحلة الحالية؟ مش قادر أعرف.. النتيجة النهائية هي إن الإنقسام الحالي بيؤدي إلى إستحالة معرفة مين فعلاً عايز مصلحة البلد ومين شغال ضد مصلحة البلد.. 

الإخوان خلقوا جو من العداء ضدهم وبين الفصائل المختلفة.. وبدأوا بمعاداة كل الجبهات من القضاء للإعلام للسياسيين للداخلية للنيابة والأزهر والكنيسة والدول الأجنبية من الخليج لأوروبا إلخ.. ده غير إنهم عمالين يحاولوا يورطوا الجيش تاني فى السياسة.. بالإضافة إلى إن كل القرارات إللى أخدوها لغاية دلوقتي ضد مصلحة الشعب بشكل مباشر وغير مفهوم سببها.. يعني من محاولة قفل المحلات الساعة عشرة لمحاولة فرض حظر التجول وفرض الضرائب الجديدة وإستعداء الناس بالداخلية.. كل ده مش مفهوم هل هما أغبياء أم هما متخلفين عقلياً أم هو مزيج من الإتنين.. فى النهاية الناس دي بتحاول إنها تشتغل لوحدها تماماً وبتحاول تغير القيادات فى الأجهزة الحكومية بناس تبعها من غير ما يكون عندها أى خطة للتغيير الحقيقي.. وبالتالي كل إللى بيحققوه هو عداء من الفصائل كلها وبس.. 

المشكلة إن فى كل مرة الإخوان بيبقوا فاهمين إنهم تقدموا خطوة فى السيطرة على مفاصل الدولة بيبقى فى جزء جديد من البلد فك منهم.. كل مرة بيبقوا حاسيين إنهم توغلوا فى مصر بيكون على حساب إن جهاز جديد أو قوى جديدة إنفصلت عنهم أو عن الدولة وبدأت تشتغل ضدهم.. 

طبعاً فيه مؤامرة.. بس غباء الإخوان مخليهم مش قادرين يفصلوا بين المؤامرة الحقيقية والمعارضة والناس إللى شغالة لمصلحة البلد حتى لو كانت مختلفة معاهم فى الطريقة..

ربنا يشفيهم يارب ويخلصنا منهم ..