الثورة الحقيقية

الثورة الحقيقية - ولا مؤاخذة - من تحت لفوق مش العكس.. ما أسهل إن رئيس يمشى أو أن وزير يقال وما أصعب إن مهندس حي أو مسؤل مخزن أنابيب بوتجاز يتشال من مكانه أو يغير من سلوكه.. وما أسهل إن يجى وزير عايز يعمل إصلاح حقيقى ويقف قدامه موظفين الوزارة ومؤسسات فسادها ويفشل فى أى إصلاحات.. 

ميدان التحرير هو التغير الفوقى.. الرئيس يتشال والوزارة تستقيل والدستور يتعمل عليه ضغط.. لكن الثورة الحقيقية هى ثورة شعب.. ثورة كل مجتمع قام وقطع طريق عشان ما عندوش بوتجاز أو أهل منطقة عملوا إعتصام عشان رافضين مصنع ملوث للبيئة بتاعتهم.. التغيير الحقيقى حا يحصل لما الضغط من الأفراد على النظام إبتداءً من أصغر واحد فى النظام مش أكبر واحد بس.. الثورة الحقيقية حصلت لما الناس ما باقتش تخاف وقررت إنها تقدر تغير واقعها بإيدها ومش منتظرة القائد إللى حا يخلصها من مشاكلها.. 

الثورة عبارة عن سباق تتابع.. ماراثون.. كل مرحلة بتسلم المرحلة إللى بعدها.. التحرير كسر حاجز الخوف وقتل اللامبالاة ومازال قادر إنه يعمل تغيرات فوقية فى إطار محدود.. ولكن ما يقدرش يغير كل واقع فى كل قرية.. إللى حا يعمل كده هما أهل القرية دى.. والثورة دى مش يوم ولا شهر ولا سنة.. دى العشر سنين اللى جاية.. 

بالنسبة لى، بعد يوم 11 فبراير الثورة موجودة فى "لا للمحاكمات العسكرية" وفى اللجان الشعبية.. وفى كل إعتصام عمالى أو أهل قرية قطعوا طريق.. دى المقاومة إللى حا تجيب تغيير للنظام مش تغيير للمسؤلين.. الثورة نجحت.. إحنا بنهد جبل من الفساد والجهل.. ما يتهدش فى يوم.. لازم يتفك حتة حتة.. 

خلاص هيمنة الجيش على الدولة إنتهت دى شكليات لكن فى الحقيقة هما فقدوا السيطرة بلا رجعة.. والإخوان إللى فاكرين إنهم حا يرجعونا للحزب الوطنى بس بدقن وفاهمين إن الموضوع تغيير وجوه يا حا يتعلموا من إللى حصل يا حا يتفرموا..

الثورة نجحت إحنا بس مش واخدين بالنا.. 

إضافة يوم 24 يناير: 
مثال بسيط للكلام أعلاه: http://www.youtube.com/watch?v=owL5W9JDiW8&feature=youtu.be