كان نفسي

أول ما الثورة قامت كنت مبسوط.. كنت شايف إن مصر حا تتغير.. إن كل الحاجات الوحشة حا تختفي.. كنت شايف إن الناس إللى كل واحد فيهم كان عايش فى قوقعة لوحده إبتدوا ينفتحوا على بعض.. الناس من الطبقات المختلفة بيتكلموا مع بعض.. كنت شايف إن إحنا حا نبقى شعب واحد بجد وحا نتخلص من عادتنا إن إحنا نحكم على بعض من بعيد.. كنت شايف إن الظلم إللى كان واقع علينا كلنا بأشكاله المختلفة حا يختفي وإن مش ممكن إللى إتظلم يكون قادر إنه في يوم من الأيام يظلم حد..

كنت حاسس إن لأول مرة كلنا بنفكر لمصلحة البلد وكل واحد بيتمنى للناس التانية الخير.. الغني شاف الفقير وعرف بيعاني من إيه.. والمسيحي فهم حجم الإضطهاد إللى السلفي كان بيعاني منه.. والمسلم فهم حجم التهميش إللى المسيحي شافه فى حياته.. والفقير عرف إن الغني مش عايزه يعاني بالشكل ده.. 

كنت حاسس إن إحنا أخيراً حا نبقى كلنا أحرار من الزنازين إللى كان حابسنا فيها مبارك ومخوفنا من بعض.. كنت مليان أمل إن إحنا كشعب ممكن نبني البلد دي مع بعض.. وإننا إتعلمنا إن إختلافتنا مش ممكن تفسد للود قضية لأن مصلحتنا كلنا واحدة.. كنت شايف إن إحنا حا نبقى مجتمع بيرحب بكل الناس لأننا مش ممكن نقبل لحد التهميش إللى كنا بنعاني منه سنين.. الإسلامي بيصلي فى الجامع بتاعه من غير خوف والمسيحي بيروح كنيسته من غير خوف والفقير بيمشي فى الشارع من غير ما يتفادى كمين الشرطة والغني مش خايف يتسرق.. البنات تقدر تنزل الشارع من غير ما تتعاكس والفنان ممكن يبدع زي ما هو عاوز من غير رقابة عليه.. كنت شايف قد إيه الحرية حا تخلينا شعب مبسوط ومبتسم.. 

كنت حاسس إن الفساد حا يختفي وإن إحنا حا نقدر نبني بلد بالكم الرهيب من الموارد إللى عندنا وإن إحنا حا نكون دولة بجد.. فيها قانون وفيها عدالة.. وفيها أمان.. وفيها فرصة لكل واحد إنه يبدع ويتطور ويكبر ويحسن من حاله.. دولة فيها ناس بتحترم بعض مش بتخاف من الشرطة.. كنت فاهم إن السياسيين إتعلموا الدرس من مبارك وإن إللى حا يجي على الشعب ممكن يعيش له تلاتين سنة بس فى النهاية الناس حا تاكل إللي يحرمها من حقوقها.. وكنت حاسس إننا أخيراً حا نبقى بنبني البلد مش بنهدمها..