ياللا ننتخب رئيس

الدليل الكامل لمرشحين الرئاسة.. 

هذه هى الحلقة الأولى فى سلسلة حلقات لتساعدك على إختيار مرشح الرئاسة الأنسب لذوقك وتوقعاتك..

عبد المنعم أبو الفتوح

____________________________________

40 سنة فى الإخوان وإضطر يسيبها بعد ما فشل فى إصلاحها بسبب التيارات المحافظة الداخلية (إللى هو خيرت الشاطر من الآخر).. وطبعاً بعد ما فشل مع خيرت الشاطر حا يقطع طنطاوى وعمر سليمان والداخلية وكده.. ما عندوش إنجازات غير فى نقابة الأطباء وطبعاً إحنا لامسين التقدم العنيف إللى حصل للطب والأطباء.. هو راجل محترم بدون أى شك (على الأقل لغاية ما الإعلام يطرشئوا) وعنده رؤية وهو فعلاً حاول يعمل إصلاح فى الإخوان..

غير كده.. أبو الفتوح يتمتع بأزمة هوية عنيفة (أو يمكن هى تربية الإخوان إللى يقولوا الشئ وضده فى نفس الجملة).. شوية يقول إسلامية وشوية يقول تركيا.. شوية ينفخ فى السياحة وشوية يفشخها.. ولكن برضه مديرة حملته يسارية متبرجة (يعنى مش لابسة حجاب وشعرها كيرلى كمان)..

إذا كنت تبحث عن رئيس محترم وإبن ناس وكيوت ومايضايقش حد وعنده صبغة إسلامية تريح ضميرك.. إنتخب أبو الفتوح

حازم أبو إسماعيل

___________________________________

من السياسيين القلائل إللى كانوا متواجدين فى الميدان وعنده حس ثورى.. أغلب معلوماته خارج الدين من قعدات دردشة وتعليقات الجهابذة إللى متابعين حلقاته على خدمة الإس إم إس إللى بتدفع فيها تلاتة جنيه دى.. معرفته بأى حاجة خارج جمهورية مصر العربية زى معرفة حضرتك باللغة البلغارية.. يمكن إنت وضعك أحسن شوية.. عنده شغف بالأرقام ويحب يرمى عشرة إتناشر صفر زيادة على أى رقم عشان بيبقى شكل الرقم أظرف بكتير.. تصريحاته كلها ثورية وعنترية ويموت فى التهديد..صاحب المقولة الشهيرة إن بيبسى يعنى إنك بتساند إسرائيل..

فكرته عن المشروع الإسلامى هى السعودية من غير البترول وطبعاً من غير الحريات الواسعة الموجودة فى السعودية.. عايز مشكوراً يحجب الستات وهيئة الأمر بالمعروف وإلى آخره من الأفكار التقدمية إللى من النوع ده.. المشكلة إنه الوحيد إللى غالباً راديكالى بالدرجة الكافية إنه يشيل العسكر..

إذا كنت تبحث عن رئيس قوى قادر على إزاحة العسكر وغالباً إزاحتك إنت والمدام والأولاد كمان بالمرة.. إنتخب أبو إسماعيل

عمرو موسى

 ____________________________________

سياسى محنك وقديم (قديم زى الجبنة الروكفوركده).. دبلوماسى.. يعنى حا يسرقك وإنت مبسوط وبتصقف كمان.. ما عندوش أى أيديولوجية واضحة.. يعنى لا تعرف هو رأسمالى ولا يسارى ولا إسلامى.. إنجازاته صفر.. كان ممكن يكون المرشح التوافقى بس ما حدش لغاية دلوقتى عارف ياخد منه حق ولا باطل.. حتى المجلس العسكرى شكله رمى طوبته من كتر ما بيلاوعهم فى الكلام.. لو واقف تحت البيت عندك وسئلته سؤال ممكن يتوهك لدرجة إنك ما تعرفش تروح..

من بقايا نظام مبارك.. لم يتهم بالفساد المالى بأى شكل.. نزل الميدان أيام التحرير عشان يتصور مع الدبابة مش أكتر.. أبعد ما يكون عن الثورية.. إبتدى الحملة بتاعته يوم 11 فبراير 2011 الساعة سابعة بليل ومن ساعتها ما بيهمدش.. أكتر مرشح لف فى البلد..

إذا كنت تبحث عن رئيس ما تعرفش عنه حاجة بس بيتكلم كتير.. إنتخب عمرو موسى

محمد سليم العوا

 ____________________________________

مفكر إسلامي.. يعنى بيقعد على كرسى ويفكر، بس بيفكر بما لا يخالف شرع الله.. يقال إنه كان أمن دولة بس غالباً هو أمن وطنى.. إشترك فى جميع اللجان الممكنة والمجالس الإستشارية والغير إستشارية إللى وقعت تحت إيده.. مفكر بقى.. ممكن تشبهه بالماء: لا لون ولا طعم ولا ريحة.. يتميز بحواجبه التى تعتبر منفصلة تماماً عن بقية وجهه.. عنده مشروع إسلامى بس مش راضى يقولنا عليه..

إذا كنت تبحث عن رئيس إسلامى وفى نفس الوقت بتخاف على مشاعر الجيش قوى.. إنتخب محمد سليم العوا

خالد على

____________________________________

محامى حقوقى يساري.. بس أقصى اليسار، يعنى لابس فى الرصيف.. الشاب الوحيد فى المرشحين المحتملين والوحيد إللى إشترك فى الثورة من أول يوم إشتراك كامل وحتى يومنا هذا.. من الشخصيات العامة فى تويتر يعنى فى تقريباً ألفين شخص يعرفوه (بالضبط هما ألفين وتسعة نفر عشان الدقة).. إتجاهاته إشتراكية / شيوعية يعنى قطاع عام وعمال وفلاحين وبس.. وإحتمال الشركة إللى إنت بتشتغل فيها تأمم وتتوزع على عمال نسيج كفر الدوار.. الوحيد إللى عنده مشروعات ثورية حقيقية بس من بتاعت عبالناصر للى بيحبوا الحاجات دى.. فما تستغربش لو لقيت نفسك كمان سنة لابس بدلة سفارى كاكى فى الصيف وزيها كم طويل بس بنى غامق فى الشتا.. ده مش عيب فى الإشتراكية بس أحب أوضح.. أغلب إنجازاته كانت فى إسترداد الشركات التى تم تخصيصها للحكومة..

بغض النظر عن موضوع أقصى اليسار.. هو أكتر مرشح يمثل الشباب والثورة..

إذا كنت تبحث عن رئيس جمهورية إشتراكى وشاب ومش فارق معاك إنك حا تكون واحد من ألفين واحد ينتخبوه.. إنتخب خالد على

منصورحسن

____________________________________

لما كان مرشح إنه يكون نائب رئيس الجمهورية كان أنا عندى 4 سنين.. من أيام ما كان مرشح نائب رئيس لغاية دلوقتى إخترعوا الفيديو والسى دى والدى فى دى والموبايل وإخترعوا الأتارى والجيم بوى والإكس بوكس.. وأخيراً الإنترنت.. وهو مازال مصمم إن التلكس أكتر طريقة مضمونة للتواصل.. الوحيد من المرشحين إللى إختار نائب رئيس وبعدين شيعه تانى يوم.. ووقع إختياره على اللواء / سامح سيف اليزل إللى هو محلل إستراتيجى وخبير أمنى وبيصلح تلاجات ويضبطلك الدش..

يقال إنه إستقال من الوزارة أيام السادات لأنه ما كانش مبسوط من الإعتقالات.. يعنى من حوالى خمسة وتلاتين سنة كان رجل ثورى..

إذا كنت تبحث عن رئيس جمهورية من باب الصدقة والإحسان.. إنتخب منصور حسن

أحمد شفيق

 ____________________________________

إذا كنت تفتقد مبارك الأب..مبارك الإنسان.. مبارك القائد.. مبارك الطيار.. فعليك وعلى شفيق.. لو بتتحسر على أيام ما قبل الثورة والإستقرار.. عليك وعلى شفيق.. لو وحشاك أيام ما كانوا الوحشين بيضربوا فى الإقسام والإخوان مستخبيين.. لازم نتنخبه.. هو رجل الكاريزما.. نفس الحضور إللى بتلاقيه من كومودينو (إتنين درج ودرفة).. نفس القدرة على التعبير بتاعت كوريك العربية.. إمكانيته فى المخاطبة شبيهة بفصاحة السجادة إللى مكتوب عليها WELCOME وإنت داخل البيت (وعليها نفس بقعة الصلصة لما القطة قطعت كيس الزبالة).. من إنجازاته مطار القاهرة الجديد.. فاهم النظام القديم كويس وبالتالى مش لازم تقلق من التغيير مع شفيق..

إذا كنت تبحث عن رئيس جمهورية يضمنلك إن ما فيش حاجة حا تتغير.. إنتخب أحمد شفيق

كده فاضل حوالى إتنين مليون مرشح رئاسى تانين حا نغطيهم فى الحلقات القادمة..